Tratamentu lahanesan ho Vasina no Vasinasaun

Ola belun sira..

Espera katak imi hotu di'ak!

Dalabarak kolega sira sei konfunde konaba saida maka tratamentu, vasina no vasinasaun!

Iha artigu ida ne'e sei koalia ituan konaba liafuan tolu refere.

Saida maka Vasina?

Vasina maka agente ka mikroorganismo ida ne'ebe hafraku ka hamate ona uza hodi fo ba animal ne'ebe saudavel hodi hasa'e nia imunidade/antibody/anticorpo hodi bele halo defesa hasoru moras.

Vasina fahe ba parte rua maka vasina ativa no inativa.

Vasina Ativa maka vasina ne'ebe kontem mikroorganismu husi moras ne'ebe iha kondisaun moris, maibe laiha risku atu hamosu moras, vasina ne'e baibain administra per oral.

Vasina inativa maka vasina ne'ebe kontem mikroorganismu moras iha kondisaun ne'ebe mate ona ka halo fraku, tamba iha risku ne'ebe boot no dalaruma mistura ona ho kimiku seluk.

 

Tipu Vasina saida deit maka eziste ba animal iha ita nia nasaun RDTL?

Bazea ba moras ne'ebe agora dadauk endemiku iha ita nia nasaun, estadu liu husi MAFP oferese vasina ba animal ne'ebe moras hanesan: New Castle Deseases iha animal Manu, Hog Cholera iha animal Fahi, Septicaemia Epizootica iha animal Karau.

Tansa eziste deit tipu vasina tolu ne'e iha ita nia nasaun?

Ezistensia tipu vasina tolu refere iha ita nia nasaun tanba, moras tolu ne'e maka endemiku iha ita nia nasaun no kauza animal barak maka mate.

Saida Maka Vasinasaun ?

Vasinasaun maka asaun ka esforsu ida atu hasae imunidade animal nian ho nunee atu bele halo defesa hasoru antigen ka mikroorganismu sira ne'ebe maka kauza moras.

 

Oinsa ita nia animal bele hetan vasinasaun?No se maka bele halo vasinasaun ba ita nia animal?

Se maluk sira hakiak animal hanesan Manu, fahi no Karau no hakarak halo vasinasaun ba ita nia animal, uluk nainain ita tenki garante ita nia animal iha kondisaun ne'ebe saudavel molok halo vasinasaun, to tempu ne'ebe di'ak liu ita nia animal halo vasinasaun maka iha idade ne'ebe sei jovem (Fulan 3-6) atu bele garante animal hirak ne'e nia imunidade. No ita bele kontaktu ba tekniku APS sira atu halo atendimentu, ba ita nia animal, hodi prevene ita nia animal husi moras. 

 Vasinasaun bele garante ita nia animal livre husi moras hotu ka lae? 

Iha parte ida ne'e maka ema barak sei konfunde no fo sala ba tekniku veterinariu sira no lakohi atu sira nia animal hetan vasinasaun, presisa hatene katak, vasinasaun ne'ebe hala'o ho tipu vasina ida so garante de'it ba tipu moras refere. La garante mos ita boot sira nia animal sei lahetan moras seluk.

Maibe se ita nia animal hetan moras seluk hanesan kauza husi parasita no bakteria bele kontaktu tekniku sira hodi halo kurativu.

Vasinasaun ne'e faan iha loja agrikultura sira ka la'e?  

Vasina diferente ho Ai-moruk/Medikamentu, hanesan imunizasaun iha ema, ne'ebe so bele hala'o no oferese husi mediku sira de'it.

Nune'e mos iha area animal nian, vasinasaun so oferese husi parte relevante de'it (Diresaun Nasional Veterinaria).

Saida maka tratamentu?

Tratamentu hanesan asaun ida ne'ebe hala'o atu kura animal hirak ne'ebe iha kondisaun moras.

Diferente ho vasinsaun ne'ebe halo ba animal ne'ebe iha kondisaun saudavel. Tratamentu bele halo bazea ba sinais klinika ne'ebe animal hatudu.

 Se maka bele halo tratamentu?

Ema ne'ebe iha responsabilidae atu halo tratamentu ba animal moras maka doutor animal, paramediku veterinaria, agente pekuaria suku no ema hirak ne'ebe maka iha konesimentu konaba area saude animal nian.

Tipu Medikamentus saida maka baibain uza?No maneira administrasaun aimoruk/medikamentus?

Medikamentus ne'ebe baibain uza maka Tipu,  antibiotika, Athementi (Antiparasita Inter no externa), antipiretik (Hatun manas), Analgesik (Moras), Antispasmodik, Antihistamn, Desinfektan no Antiseptika.

No maneira administrasaun ne'ebe uza maka, Per oral, Parenteral (Intravenosa, subcutanea, intra-arterial, intramedular, epidural), Topikal no Inhalatoriu.